Tinubu Zai Siya Wa Sarakunan Abuja Motoci

KANO —

Shugaban Ƙasa Bola Ahmed Tinubu ya amince da sayen sababbin motocin alfarma kirar SUV domin bai wa sarakunan gargajiya na Babban Birnin Tarayya Abuja.

Ministan Abuja, Nyesom Wike, ne ya bayyana hakan a ranar Asabar yayin wani taron haɗin gwiwar masu ruwa da tsaki na Rainbow Coalition da kuma ƙaddamar da ’yan takarar Majalisar Tarayya a Abuja.

Wike ya ce amincewar shugaban ƙasar na sayen motocin na daga cikin matakan da gwamnatin ke ɗauka domin girmama sarakunan gargajiya bisa rawar da suke takawa wajen kare al’adu da tabbatar da zaman lafiya a tsakanin al’ummominsu.

Ministan ya kuma bayyana cewa Tinubu ya amince da ɗaukaka matsayin masarautun gargajiya da ke Abuja, matakin da ya ce ya shafe shekaru 27 ba tare da an aiwatar da shi ba.

A cewarsa, wannan mataki na nuna irin muhimmancin da shugaban ƙasar ke bai wa sarakunan gargajiya da kuma gudummawar da suke bayarwa wajen tafiyar da al’amuran al’umma.

Wike ya ce za a bai wa sarakunan motocin kafin ƙarshen watan Disamba na wannan shekara.

A cikin bayanin da hadimarsa, Rabi Musa Umar, ta fitar, an ruwaito ministan yana cewa shugaban ƙasar ya bayyana cewa ba za a bar sarakunan gargajiya su ci gaba da gudanar da ayyukansu ba tare da samun motocin da suka dace da matsayinsu ba.

An ambato Wike yana cewa: “Shugaban ƙasa ya ce ba za ku zama sarakuna da baki kawai ba. Ba za ku zama sarakuna kuna hawa babur mai kafa uku ko babur na haya ba. Da yardar Allah, kafin watan Disamba, kowannenku zai samu motar SUV.”

Ya ƙara da cewa babu wata masarauta da ta fi buƙatar kulawa da ƙarfafawa kamar masarautun gargajiya na Babban Birnin Tarayya Abuja.

Baya ga motocin da aka tanada wa sarakunan gargajiya, Wike ya bayyana cewa shugaban ƙasar ya kuma amince da sayen motocin bas guda huɗu domin amfanin matasan babban birnin tarayya.

Ministan ya kuma ce Tinubu na shirin ganawa da matasan a ranar 10 ga Nuwamba.

Yayin da yake magana kan zaɓen 2027, Wike ya buƙaci magoya bayan jam’iyyar APC da su tabbatar da cewa sun samu nasara a rumfunan zaɓensu, mazabunsu da ƙananan hukumominsu a zaɓen da aka tsara gudanarwa ranar 16 ga Janairun 2027.

Ya ce bai kamata wani ya yi ikirarin cewa jam’iyyar ta samu nasara ba, alhali ya sha kaye a rumfar zaɓensa, domin hakan na nuna cewa bai bayar da gudummawar da ta dace wajen nasarar jam’iyyar ba.

Ministan ya kuma gargaɗi magoya bayan jam’iyyar da kada su sake maimaita kura-kuran da aka tafka a zaɓen 2023.

Wike ya bayyana kwarin gwiwarsa cewa Sanata Philip Tanimu Aduda zai lashe zaɓen kujerar Sanatan Abuja a watan Janairun 2027, yana mai cewa yana da kyakkyawar alaƙa da al’ummar yankin.

A wani labarin makamancin haka, an ruwaito cewa Mataimakin Shugaban Majalisar Dattawa, Sanata Jibrin Barau, ya bayyana kwarin gwiwarsa cewa Shugaba Bola Ahmed Tinubu zai sake lashe zaɓen shugaban ƙasa a shekarar 2027.

Barau ya bayyana hakan ne yayin ƙaddamar da kwamitocin yaƙin neman zaɓe na ƙananan hukumomin Dawakin Tofa, Tofa da Rimin Gado da ke Jihar Kano.

Ya ce nazarin masana harkokin siyasa da kuma yanayin siyasar Najeriya a halin yanzu na nuna cewa Shugaba Tinubu na da damar sake lashe zaɓen shugaban ƙasa mai zuwa.

Abba, wanda ya kafa ƙungiyar Haske Bola Tinubu Organisation (HBTO), ya samu tarba daga Mataimakin Shugaban Jam’iyyar APC na Arewa, Bukar Dalori.

A cewar wata sanarwa da Yusi Buba, babban mai taimaka wa mataimakin shugaban jam’iyyar kan harkokin wayar da kan matasa, ya fitar, Abba ya bayyana goyon bayansa ga shugabancin Shugaba Bola Ahmed Tinubu da kuma ci gaba da mulkinsa bayan zaɓen 2027.

Sanarwar ta bayyana cewa motocin bas guda 10 da Abba ya bayar za su taimaka wajen jigilar masu goyon bayan Tinubu, tare da sauƙaƙa gudanar da ayyukan wayar da kan jama’a.

Abba ya ce ƙungiyarsa za ta fara aiwatar da shirin tallafin sufuri ne a Babban Birnin Tarayya, Abuja, kafin daga bisani ta faɗaɗa shi zuwa sauran jihohin Najeriya.

Baya ga motocin bas ɗin, Abba ya bayyana shirin ƙungiyarsa na gudanar da gangamin tattara magoya baya har mutum miliyan biyu a faɗin shiyyoyin siyasa shida na Najeriya, inda za a fara shirin daga Abuja.

Ya kuma bayyana cewa ƙungiyar na shirin ƙaddamar da babban gangamin siyasa a Jihar Ribas a makon farko na watan Nuwamba, tare da kafa rassanta a sassa daban-daban na ƙasar.

Matakin Abba ya zo ne bayan sauya sheƙarsa daga jam’iyyar PDP zuwa APC a watan Janairun 2026, inda ya bayyana goyon bayansa ga takarar Shugaba Bola Ahmed Tinubu a karo na biyu.

Wannan matsaya ta sanya Abba a wani ɓangaren siyasa daban da mahaifinsa, Atiku Abubakar, wanda shi ne ɗan takarar shugaban ƙasa na jam’iyyar ADC a zaɓen 2027.

Da yake bayyana dalilin matsayarsa, Abba ya ce ra’ayin siyasa zaɓin mutum ne da ya kamata ya dogara da lamirinsa da fahimtarsa, ba wai dangantakar iyali ba.

Ya bayyana cewa kowane mutum na da ’yancin zaɓar jam’iyyar siyasa ko ɗan takarar da yake son goyon baya, sannan ya kamata a mutunta ra’ayoyin waɗanda suka zaɓi wata hanya ta daban.