Shin Kirkirarriyar Basira Na Iya Kiyaye Bayananku?

KANO —

Rushewar kamfanin ƙirƙirarriyar basira (AI) mai suna Character AI ta sake buɗe wata muhimmiyar tambaya da ba kasafai ake tattaunawa a kai ba: Yaya amincin bayanan sirrin masu amfani yake idan kamfanin da ke adana su ya durƙushe, aka sayar da shi ko kuma aka rufe shi gaba ɗaya?

A makon da ya gabata, lokacin da na buɗe asusu a wannan dandali, saƙon farko da na samu ya kasance irin na jan hankalin kwastomomi. Wani chatbot mai suna “Jessica” ya gabatar da kansa a matsayin yarinya da iyayenta ba sa gida, sannan ya ba da shawarar a yi hirar soyayya.

Na mayar da martani da cewa: “Na gode, ba ni da sha’awar hakan.”

Na ƙi gayyatar Jessica, amma miliyoyin mutane, ciki har da yara, sun riga sun ƙulla kusanci da wasu chatbots na wannan kamfani.

Masana harkar kare sirri sun ce haɗurran da ke tattare da wannan yanayi ya kamata su tayar da hankalin kowa, ko da kuwa bai taɓa amfani da Character.AI ba.

A cewarsu, wannan na iya zama farkon wata babbar matsala da ke fuskantar masana’antar AI.

Sai dai abin farin ciki shi ne akwai wasu matakai masu sauƙi da mutane za su iya ɗauka domin kare bayanan sirrinsu.

Amma wasu masana na ganin cewa masana’antar AI na fuskantar wata babbar matsala ta kuɗi, saboda kuɗaɗen da ake kashewa wajen ƙirƙira da gudanar da waɗannan tsare-tsare sun yi yawa, har wasu kamfanoni ba sa samun ribar da za ta iya ɗaukar nauyin ayyukansu.

Idan wannan matsala ta ƙara tsananta, ana iya samun kamfanonin AI da dama da za a tilasta musu haɗewa da wasu kamfanoni ko kuma rufe ayyukansu gaba ɗaya.

Idan hakan ta faru, bayanan sirri da miliyoyin masu amfani suka shigar cikin waɗannan tsare-tsare na iya kasancewa cikin bayanan da za a sayar ko kuma a miƙa wa wasu kamfanoni. Hakan na iya faruwa ba tare da masu amfani sun san inda bayanansu suka dosa ba.

Sayar da bayanan masu amfani idan kamfani ya durƙushe ba sabon abu ba ne. Sai dai masana’antar AI ta ƙara tsananta wannan haɗari saboda yawan bayanan sirri na musamman da waɗannan tsare-tsare ke tattarawa.

“Idan mutane suna tattaunawa da chatbot, sau da yawa suna bayyana masa bayanan kansu masu matuƙar muhimmanci,” in ji Callie Schroeder, daraktar shirin AI da Hakkokin Ɗan Adam a cibiyar Electronic Privacy Information Center (EPIC).

A nan ya kamata a yi tunanin irin bayanan da mutum zai iya bayyana wa chatbot mai suna Jessica idan aka ci gaba da tattaunawa da shi na tsawon lokaci.

Schroeder ta kuma yi gargadin cewa haɗarin ba ya tsaya ga waɗanda ke amfani da AI kaɗai, domin hatta mutanen da ba sa amfani da irin waɗannan manhajoji na iya fuskantar matsalar.

Ta ce: “Ko da ba ka amfani da AI, har yanzu kana cikin haɗari, domin wasu masu amfani da shi na iya raba bayanai game da abokansu da ’yan uwansu. Wani mutum na iya bayyana yadda yake ji game da mahaifiyarsa ko kuma ya ba da labarin wani abu da abokinsa ya gaya masa. Ta haka, zai iya tona bayanan sirrin mutumin da bai taɓa amfani da wannan sabis ba.”

Wannan na nuna cewa haɗurran da suka shafi kare sirri ba su shafi masu amfani da AI kawai ba. A wata ma’ana, kusan kowa na iya fuskantar wannan matsala, ko da kuwa bai taɓa amfani da irin waɗannan tsare-tsare ba.

Fasahar kwaikwayon tunanin ɗan Adam, wato Artificial Intelligence (AI), na samun ci gaba cikin sauri, inda take sauya yadda ake gudanar da abubuwa da dama a rayuwar yau da kullum.

Sai dai duk da irin ci gaban da take samu, wasu masana na gargaɗin cewa ana iya amfani da wannan fasaha wajen aikata munanan ayyuka, sannan tana iya zama barazana ga guraben ayyukan yi.

AI fasaha ce da ke bai wa kwamfutoci damar yin tunani, gudanar da ayyuka da kuma amsa tambayoyi ta hanyar da ta yi kama da yadda ɗan Adam ke yi.

Ana cusa bayanai masu yawa cikin kwamfutoci, sannan a horar da su domin su iya gano tsarin abubuwa, yin hasashe, warware matsaloli da kuma koyon darussa daga kurakuran da suka yi.

Wannan fasaha tana aiki ne ta hanyar amfani da wasu tsare-tsaren bayanai da ake kira algorithms. Waɗannan kuwa jerin dokoki ne da aka tsara domin kwamfuta ta bi su yadda ya kamata wajen kammala wani aiki.

AI ita ce tushen mataimakan kwamfuta masu karɓar umarni ta murya, irin su Siri da Alexa.

Tana taimaka wa manhajojin Spotify, YouTube da BBC iPlayer wajen masu amfani da su shawarwarin abubuwan da za su so sauraro ko kallo a gaba.

Facebook da Twitter na amfani da ita wajen tantance abubuwan da za su riƙa nunawa masu amfani da shafukansu na sada zumunta.

Kamfanin Amazon ma yana amfani da wannan fasaha wajen nazarin yadda kwastomominsa ke sayayya, domin ba su shawarwarin kayayyakin da za su iya buƙata a nan gaba. Haka kuma, kamfanin na amfani da ita wajen gano da dakile yaɗuwar bayanan ƙarya.

Saboda ƙarancin ƙa’idojin da ke kula da yadda ake amfani da fasahar AI a halin yanzu, masana na gargadin cewa saurin ci gabanta na iya haifar da haɗurra.

Wasu daga cikinsu har sun yi kira da a dakatar da bincike da ƙarin bunƙasa wannan fasaha.

A watan Mayu, Geoffrey Hinton, wanda ake ɗauka a matsayin ɗaya daga cikin waɗanda suka taka muhimmiyar rawa wajen bunƙasa fasahar AI, ya yi murabus daga aikinsa a kamfanin Google, inda ya yi gargaɗin cewa nan gaba kaɗan AI na iya kaiwa matakin basira da ya zarce na ɗan Adam.

Daga baya a cikin wannan watan, Cibiyar Tsaro ta AI ta Amurka ta fitar da wata sanarwa da manyan ƙwararrun masana fasaha suka nuna goyon bayansu gare ta.