Wata Mata Ta Caka Wa Mijinta Wuƙa

KANO —

Rundunar ’Yan sandan Jihar Bauchi ta kama wata mata mai shekaru 18, mai suna Fatima Dalha, bisa zargin caka wa mijinta mai shekaru 30 wuƙa a ciki yayin da wata rigimar cikin gida ta ɓarke a Ƙaramar Hukumar Dass ta jihar Bauchi.

Lamarin ya faru ne da misalin ƙarfe 6:00 na safiyar ranar Lahadi, 25 ga Oktoba, 2026, a yankin Lirr Bajar da ke ƙaramar hukumar.

Rahotanni sun nuna cewa saɓani kan kuɗi, kayan sawa da kuma wayar salula da matar ta ce mallakinta ne, su ne suka haddasa rikicin tsakanin ma’auratan. Ana zargin cewa rashin fahimtar da ta taso a tsakaninsu ta tsananta har ta rikide zuwa faɗa, inda matar ta ɗauki wuƙa ta caka wa mijin nata a ciki.

Bayan samun labarin faruwar lamarin, jami’an ’yan sanda daga ofishinsu da ke Dass sun garzaya zuwa wurin domin ɗaukar matakan da suka dace. Daga nan ne suka kai mutumin asibiti domin samun kulawar likitoci, inda har yanzu yake ci gaba da karɓar magani.

Kakakin rundunar ’yan sandan jihar, SP Nafiu Habib, ya bayyana cewa jami’an sun kuma yi nasarar kuɓutar da matar daga hannun wasu fusatattun mutane da suka yi ƙoƙarin kashe ta ba tare da bin ƙa’ida da tanadin doka ba saboda abinda ya faru da mijinta.

Rundunar ’yan sandan ta nuna muhimmancin barin jami’an tsaro da hukumomin shari’a su gudanar da aikinsu, maimakon ɗaukar doka a hannu, musamman a irin waɗannan sabani tsakanin ma’aurata.

Ta tabbatar da cewa an tsare matar da ake zargi da aikata laifin, tare da ƙwace wuƙar da ake zargin ta yi amfani da ita wajen caka wa mijinta. Ana sa ran miƙa lamarin ga sashen binciken manyan laifuka na jihar domin gudanar da cikakken bincike da gano ainihin yadda abin ya faru.

A nasa ɓangaren, Kwamishinan ’Yan sandan Jihar Bauchi, Sani-Omolori Aliyu, ya bayyana damuwarsa kan yadda ake samun ƙaruwar rikice-rikicen cikin gida tsakanin matasan ma’aurata, yana mai jaddada muhimmancin warware saɓani cikin lumana ba tare da amfani da tashin hankali ba.

Kakakin rundunar ’yan sandan ya bayyana cewa mijin ya faɗi ƙasa yana zubar da jini bayan ta caka masa wukar inda ya samu rauni a cikinsa, lamarin da ya fusata jama’ar da suka taru a wurin. Sai dai, jami’an ’yan sandan da suka isa wurin cikin gaggawa sun samu nasarar kuɓutar da matar daga hannun mutanen da suka fusata.

A halin yanzu, mutumin na ci gaba da kwance a asibiti, inda likitoci ke kula da lafiyarsa sakamakon raunin da ya samu.

A nasa ɓangaren, Kwamishinan ’Yan sandan Jihar Bauchi, CP Sani-Omolori Aliyu, ya yi kira ga jama’a da su riƙa warware duk wani saɓani da ya taso tsakaninsu cikin lumana, ba tare da amfani da tashin hankali ba.

Ya kuma gargaɗi al’umma da su guji ɗaukar doka a hannunsu, yana mai jaddada cewa bai kamata mutane su yi ƙoƙarin hukunta wanda ake zargi da aikata laifi ba tare da bin tsarin doka ba.

Kwamishinan ya tabbatar da cewa rundunar za ta gudanar da bincike kan lamarin yadda ya kamata, tare da tabbatar da cewa an bi ƙa’idojin doka wajen gudanar da shari’ar domin tabbatar da adalci ga dukkan waɗanda abin ya shafa.

A Najeriya da ma wasu ƙasashen duniya, ana ci gaba da samun rahotannin tashin hankali a cikin gidajen aure, inda wasu mata ke caka wa mazajensu wuƙa sakamakon saɓani da ya taso tsakaninsu, kishi ko kuma rigingimun cikin gida.

A cewar bayanan da ake dangantawa da irin waɗannan lamura, matsalolin suna samo asali ne daga tsananin kishi, rashin haƙuri, matsin tattalin arziki da kuma duka ko cin zarafi a tsakanin ma’aurata. A wasu lokuta, rashin iya shawo kan saɓani cikin lumana na iya sa takaddama ta rikide zuwa faɗa mai muni, wanda zai iya jawo munanan raunuka ko ma rasa rai.

Jami’an tsaro na ci gaba da jan hankalin ma’aurata da su riƙa neman hanyoyin warware saɓani cikin lumana, tare da kai koke-kokensu ga iyaye, dattawa, masu ba da shawarar zaman aure ko hukumomin da abin ya shafa idan matsalar ta gagara warwarewa. Sun kuma gargaɗi jama’a da su guji ɗaukar doka a hannunsu, domin kuwa tashin hankali ba ya magance matsala, sai dai yana iya ƙara ta’azzara ta tare da jefa rayuka cikin haɗari.

Rahotanni sun nuna cewa akwai dalilai daban-daban da ke haddasa rikice-rikice tsakanin ma’aurata, duk da cewa ana sa ran zaman aurensu zai kasance na har abada, amma daga baya a samu akasin haka. Daga cikin abubuwan da ake dangantawa da irin waɗannan rikice-rikicen akwai zargin cin amanar aure, saɓani kan abinci, rikicin da ya shafi wayar salula da kuma wasu matsalolin cikin gida.

Bayanan sun kuma nuna cewa wadannan matsalolin sun shafi maza da mata masu matsayi da shekaru daban-daban. Tsakanin shekarar 2021 zuwa 2025, har yanzu ba a samu alamun kawo ƙarshenta ba.

Alƙaluman da aka gabatar sun nuna cewa mata ne suka fi rasa rayukansu a irin waɗannan rikice-rikicen, inda aka kashe mata 96 daga cikin mutane 136 da suka mutu. Wannan adadi ya kusan ninka na mazan da aka kashe, waɗanda adadinsu ya kai 39.

Akwai wasu munanan lamura da suka shafi ma’aurata, ciki har da kisan wata amarya da aka kashe a lokacin da ake dab da ɗaura mata aure. Wannan na ƙara nuna irin mummunan tasirin da rikice-rikicen cikin gida ke haifarwa, musamman idan aka kasa shawo kansu cikin lumana. Shi yasa ake bawa ma’aurata shawara da su guji abubuwan da zasu sa su jiwa abokanan rayuwarsu mumunan rauni.