Su Wane Ne Jagororin Kamfen Ɗin Tinubu?

KANO —

Yayin da harkokin siyasa ke ƙara ɗaukar zafi a Najeriya gabanin babban zaɓen shekarar 2027, jam’iyyun siyasa daban-daban sun fara ƙoƙarin ganin sun samu karɓuwa da goyon bayan al’umma.

Jam’iyyun na amfani da dabaru mabambanta wajen jan hankalin masu zaɓe domin samun nasara a zaɓen da ke tafe. Daga cikin waɗannan dabaru akwai naɗa manyan jiga-jigan siyasa domin jagorantar yaƙin neman zaɓen jam’iyyunsu.

Manyan jam’iyyun ƙasar, ciki har da APC, ADC, NDC da wasu, sun naɗa fitattun mutane masu tasiri domin su jagoranci kamfen ɗinsu a faɗin ƙasar.

Dangane da haka, mun duba waɗanda aka ɗora wa alhakin jagorantar yaƙin neman zaɓen jam’iyyun APC, ADC, NDC da kuma wasu jam’iyyu.

Kwamitin yaƙin neman zaɓen shugaban ƙasa na jam’iyyar APC ya naɗa Sanata Abdulaziz Yari a matsayin darakta-janar domin ya jagoranci kamfen ɗin jam’iyyar a ƙarshen watan Agusta.

Jam’iyyar ta zaɓi tsohon gwamnan jihar Zamfara ne bisa la’akari da ƙwarewarsa da gogewarsa a harkokin siyasa.

Sanata Abdulaziz Yari fitaccen jigo ne a siyasar Najeriya, kuma a halin yanzu yana wakiltar shiyyar Zamfara ta Yamma a Majalisar Dattawan ƙasar.

Ya jagoranci jihar Zamfara a matsayin gwamna na wa’adi biyu, daga shekarar 2011 zuwa 2019. Haka kuma, ya taɓa zama shugaban ƙungiyar gwamnonin Najeriya (NGF).

Masana siyasa na ganin cewa Yari na da tasiri da kuma damar taimaka wa APC wajen samun ƙuri’u a zaɓen da ke tafe.

Ana kuma kallonsa a matsayin ɗan siyasar da ke yawan tallafa wa marasa ƙarfi a jiharsa, musamman a lokutan ibada da azumi, lamarin da ya ƙara masa farin jini da tasiri a tsakanin al’umma.

An haifi Yari a shekarar 1968 a ƙaramar hukumar Talata Mafara ta jihar Zamfara.

Ya fara taka rawa sosai a harkokin siyasa ne a farkon Jamhuriya ta Huɗu a shekarar 1999. A wancan lokaci, ya yi aiki a matsayin sakataren jam’iyyar ANPP ta jihar Zamfara, kafin daga bisani ya zama shugaban jam’iyyar na jihar.

Jam’iyyar ADC ta ɗora wa Sanata Austin Akobundu alhakin jagorantar yaƙin neman zaɓenta, tana mai cewa tana buƙatar ƙwarewarsa da jajircewarsa a siyasa domin taimaka mata wajen cimma burinta.

Akobundu, wanda ke wakiltar mazaɓar Abia ta Tsakiya a Majalisar Dattawa, ya karɓi wannan muƙami ne domin amfani da gogewarsa wajen tattara ƙarfi da basirar jam’iyyar don samun nasara.

An haife shi ne a ranar 10 ga Maris, 1956. Tsohon kanal ne a rundunar sojin Najeriya, kuma ya shiga Majalisar Dattawa a shekarar 2023 bayan da kotu ta soke zaɓen wanda ya riƙe kujerar a baya.

Ya taɓa riƙe muƙamin ƙaramin ministan tsaro a gwamnatin tsohon shugaban ƙasa Goodluck Jonathan, tare da wasu muƙamai a jam’iyyar PDP. Sai dai a watan Maris na 2026 ya fice daga PDP zuwa ADC.

Daga baya, ya bayyana goyon bayansa ga ɗan takarar shugaban ƙasa na ADC, Atiku Abubakar, yana mai cewa idan Atiku ya yi nasara, zai tafiyar da kowa a ƙasar ba tare da nuna bambanci ba.

Ya samu tikitin sake tsayawa takarar sanata a zaɓen 2027 a ƙarƙashin jam’iyyar ADC.

Gogewarsa ta soja, ƙwarewarsa a harkokin gudanarwa da tsare-tsare a PDP, kasancewarsa ɗan Kudu maso Gabas da kuma goyon bayan da yake bai wa Atiku, na daga cikin abubuwan da suka sa ake kallonsa a matsayin wanda zai iya taimakawa wajen samar da daidaito tsakanin yankuna a cikin jam’iyyar da ke neman haɗin kan siyasa.

Ita kuwa jam’iyyar NDC ta amince da Ibrahim Abdulkarim, wanda aka fi sani da Ibrahim Ziter, a matsayin wanda zai jagoranci kwamitin yaƙin neman zaɓenta.

Abdulkarim ƙwararre ne a fannin fasahar sadarwa ta zamani (ICT), ɗan kasuwa kuma ɗan siyasa. Ayyukansa sun shafi bunƙasa fasaha, wayar da kan masu zaɓe, ƙirƙire-ƙirƙire da ci gaban al’umma.

An haife shi a ranar 14 ga Oktoba, 1976 a birnin Sakkwato.

A harkokin siyasa, Abdulkarim ya riƙe muƙamai daban-daban na gudanarwa da bayar da shawarwari. Ya taɓa zama mai ba da shawara ga ƙungiyar Buhari Support Organisation (BSO), inda ya taka rawa wajen tsarawa da ƙirƙirar katin karɓar gudummawa domin tallafa wa takarar Buhari a shekarar 2015.

Ya taimaka wajen tsara rajistar masu bayar da gudummawa, ƙungiyoyin siyasa da kuma tsarin gudanar da yaƙin neman zaɓe.

A baya-bayan nan, ya riƙe muƙamin darakta-janar na kwamitin yaƙin neman zaɓen shugaban ƙasa mai zaman kansa na Obi-Datti. Haka kuma, an naɗa shi sakataren Kwamitin Ba da Shawara na Obi-Datti bayan zaɓe.

Waɗannan muƙamai da gogewar da ya samu a cikinsu sun ba shi ƙwarewa a harkokin kamfen, lamarin da ya sa jam’iyyar NDC ta ga dacewar naɗa shi darakta-janar na yaƙin neman zaɓenta.

A nata ɓangaren, jam’iyyar African Action Congress (AAC) ta sanar da naɗa Abdullahi Usman a matsayin darakta-janar na kwamitin yaƙin neman zaɓenta.

An ɗora masa alhakin jagorantar dabarun jan hankalin jama’a da neman goyon bayansu ga jam’iyyar a zaɓen 2027.

Usman na da gogewa a fannoni daban-daban na siyasa, kuma ana sa ran zai yi amfani da wannan ƙwarewa wajen taimaka wa jam’iyyar cimma manufofinta.

Ana sa ran zai yi amfani da dabarun fasaha, tsarin gudanarwa da kuma wayar da kan al’umma a matakin ƙananan hukumomi domin ganin yaƙin neman zaɓen Sowore–Magashi ya isa ga ’yan Najeriya a dukkan sassan ƙasar.

Jam’iyyar ta bayyana cewa tana son kamfen ɗinta ya isa manyan birane da jihohin Najeriya, har ma da yankunan karkara, domin tallata manufofinta da kuma ɗan takararta.