Obi Ya Gargaɗi Masu Shirin Maguɗi A Zaɓen 2027

KANO —

Ɗan takarar shugaban ƙasa na jam’iyyar NDC, Peter Obi, ya bayyana cewa a shirye yake ya rasa ransa domin kare ƙuri’unsa da na magoya bayansa a zaɓen 2027.

Obi ya kuma sha alwashin hukunta duk wanda aka samu da laifin maguɗin zaɓe idan ya zama shugaban ƙasa, ciki har da jami’an gwamnati da ma’aikatan hukumar zaɓe.

Ya bayyana hakan ne a ranar Laraba yayin wani taron tattaunawa na jam’iyyar NDC a Jihar Nasarawa. A wani taron makamancin haka da aka gudanar a birnin Port Harcourt na Jihar Rivers, Obi ya yi kira ga ’yan Najeriya da su tashi tsaye domin hana maimaita maguɗi da kura-kuran da aka samu a zaɓen 2023.

Tsohon gwamnan Jihar Anambra ya ce gwamnatinsa za ta tabbatar da bin dokokin zaɓe, tare da tabbatar da cewa babu wanda ya fi ƙarfin doka.

Ya ƙara da cewa za a gurfanar da duk wanda aka samu da laifin sauya sakamakon zaɓe, ba tare da la’akari da matsayinsa ko tasirinsa a siyasa ba.

Obi ya jaddada cewa babu wanda zai sake tsoratar da masu zaɓe a rumfunan zaɓe, yana mai cewa bai kamata mutane kaɗan su razana dimbin masu zaɓe ba.

Ya ce: “Babu wanda zai sake tsoratar da mu a rumfar zaɓe. Idan ka je kowace rumfa a yau, mafi yawan jami’an zaɓe da za ka gani su biyar ne, yayin da masu zaɓe suka kai 40 zuwa 50. Babu yadda mutane biyar za su tsoratar da mutum 50. A wannan karon dukkanmu za mu ceto ƙasarmu. Wani ya ce a shirye muke mu mutu. Bari na gaya muku, ni ma a shirye nake na mutu.”

Haka kuma, Obi ya bayyana cewa za su samar da ingantaccen tsarin gudanar da zaɓe domin hana duk wata barazana ko maguɗi ta hanyar na’urar tattara sakamakon zaɓe ta IReV ta hukumar INEC.

Ya gargaɗi masu shirin kawo cikas ga tsarin zaɓe ta hanyar yanar gizo da cewa ba za a amince da duk wata matsala da aka samar da gangan ba.

A nasa ɓangaren, mataimakin ɗan takarar shugaban ƙasa na NDC, Rabiu Musa Kwankwaso, ya buƙaci masu zaɓe da su guji maimaita kura-kuran da aka yi a zaɓen baya.

Obi ya kuma yi kira da a ƙara tsaurara ƙa’idojin karatun da ake buƙata daga masu neman muƙaman zaɓe, yana mai cewa duk wanda ke son tsayawa takara ya kamata ya kammala karatun firamare da sakandare.

Ya ce gudanar da zaɓe cikin gaskiya da adalci na da muhimmanci wajen ƙarfafa amincewar jama’a da dimokuraɗiyya, tare da tabbatar da cewa shugabanni sun samu nasara bisa zaɓin al’umma.

Tsohon gwamnan ya daɗe yana kira da a yi gyare-gyare a tsarin zaɓen Najeriya, tare da tabbatar da gaskiya, riƙon amana da kuma ƙarfafa hukumomin da ke da alhakin kare dimokuraɗiyya.

Ɗan takarar shugaban ƙasa na jam’iyyar NDC, Peter Obi, ya buƙaci magoya bayansa da kada su firgita sakamakon barazana ko tsoratarwa, yana mai cewa babban abin da ya kamata su mayar da hankali a kai shi ne tabbatar da mutunta zaɓin ’yan Najeriya a akwatin zaɓe.

“A shirye nake na mutu,” in ji Obi, yayin da yake mayar da martani ga wani magoya bayansa da ya bayyana cewa a shirye yake ya yi kowace irin sadaukarwa domin ganin an samu sauyi a Najeriya.

Obi ya ce shi ma a shirye yake ya tsaya tare da ’yan Najeriya masu fafutukar tabbatar da cewa an mutunta ƙuri’unsu, kuma an ƙirga su yadda ya kamata.

A cewarsa, samun sauyin siyasa a Najeriya na buƙatar ’yan ƙasa su shiga harkokin siyasa, yaƙin neman zaɓe da kuma tsarin zaɓe gabaɗaya, maimakon zama ’yan kallo.

Ya kuma bayyana ƙwarin gwiwarsa cewa duk wani yunƙurin yin maguɗin zaɓe a 2027 zai fuskanci turjiya mai ƙarfi, duk da cewa bai yi cikakken bayani kan irin matakan da ake iya ɗauka wajen murɗe zaɓen ba.

Ɗan takarar ya kuma yi amfani da taron wajen danganta matsalolin tattalin arziƙi da ƙarancin ababen more rayuwa da abin da ya kira gazawar shugabanci.

Ya ce ba za a iya magance matsalolin da ke addabar muhimman sassan ƙasar nan ba tare da fara magance matsalar ingancin shugabannin da ke tsara manufofi da tafiyar da gwamnati ba.

Obi ya kawo misalin halin da matatun man fetur na Najeriya ke ciki, yana mai cewa matsalolin da suka dabaibaye muhimman kadarorin gwamnati na nuna akwai ƙalubale a fannin shugabanci.

Ya buƙaci ’yan Najeriya su ɗauki zaɓen 2027 a matsayin damar neman shugabanci nagari da kuma tabbatar da cewa waɗanda aka zaɓa sun sauke nauyin da ke kansu.

A cewarsa, ƙuri’ar ’yan Najeriya za ta taka muhimmiyar rawa wajen tsara makomar ƙasar a shekaru masu zuwa.

An gudanar da taron ne a Fatakwal, Jihar Rivers, a matsayin wani ɓangare na jerin tattaunawar da Obi ke yi da jama’a a sassa daban-daban na Najeriya gabanin zaɓen shugaban ƙasa na 2027.

Gidan Talabijin na Channels ya ruwaito cewa taron ya bai wa mahalarta damar yin tambayoyi da kuma tattaunawa kan ƙalubalen siyasa, tattalin arziƙi da tsaro da ƙasar ke fuskanta.

Obi, wanda ya zo na uku a zaɓen shugaban ƙasa na 2023 a ƙarƙashin jam’iyyar Labour Party (LP), yanzu yana neman kujerar shugaban ƙasa a ƙarƙashin jam’iyyar NDC.

Ya ci gaba da kasancewa cikin fitattun ’yan siyasar adawa da ke bayyana ra’ayoyinsu kan shugabanci da kuma shirye-shiryen babban zaɓen 2027.