Tinubu Zai Tafi Saudiyya Domin Yi Wa Ƙasa Addu’a

KANO —

Shugaban Ƙasa Bola Ahmed Tinubu zai bar Abuja a ranar Alhamis zuwa birnin Makka da ke ƙasar Saudiyya, domin gudanar da ibadar Umrah.

Mai ba shugaban ƙasa shawara kan harkokin yaɗa labarai da dabarun sadarwa, Bayo Onanuga, ne ya bayyana hakan a cikin wata sanarwa da ya fitar ranar Laraba.

Onanuga ya ce ziyarar za ta ba Tinubu damar gudanar da ibada, tare da roƙon Allah Ya azurta Najeriya da zaman lafiya, haɗin kai, kwanciyar hankali da ci gaba mai ɗorewa.

Sanarwar ta ƙara da cewa shugaban ƙasar zai yi addu’ar neman albarkar Allah ga Najeriya da al’ummarta yayin da yake birnin Makka.

Kafin ya bar Abuja, ana sa ran Tinubu zai ƙaddamar da wasu kayan aiki da Rundunar Sojin Saman Najeriya ta saya domin inganta ayyukanta.

Za a gudanar da bikin ƙaddamar da kayan aikin ne a ɓangaren filin jirgin saman Nnamdi Azikiwe da aka tanada domin shugaban ƙasa.

A cewar Onanuga, ana sa ran Tinubu zai dawo Najeriya a mako mai zuwa bayan kammala ibadar Umrah.

Se de kuma Tsohon mataimakin shugaban ƙasa, Atiku Abubakar, ya yi kira ga Shugaba Bola Ahmed Tinubu da ya riƙa wallafa hotuna da bidiyoyi na kullum domin tabbatar da cewa yana birnin Makka na ƙasar Saudiyya, inda ya je gudanar da ibadar Umrah.

Atiku ya nuna shakku kan ainihin inda shugaban ƙasar zai je, duk da sanarwar da fadar shugaban ƙasa ta fitar cewa zai tafi Saudiyya domin gudanar da ibadar.

Jaridar Daily Trust ta ruwaito cewa daraktan yaɗa labarai na dabarun yaƙin neman zaɓen shugaban ƙasa na jam’iyyar ADC, Phrank Shaibu, ne ya fitar da sanarwar da ke ɗauke da matsayar Atiku.

A cikin sanarwar, Atiku ya yi zargin cewa akwai yiwuwar Tinubu ya ɗan yi zama a Makka kafin ya wuce zuwa Faransa. Ya ce bayanan sirri da yake da su sun nuna cewa Faransa ce ainihin inda shugaban ƙasar ke shirin zuwa, duk da sanarwar tafiyarsa domin gudanar da Umrah.

Tsohon mataimakin shugaban ƙasar ya kuma yi tambayoyi kan ko tafiyar tana da alaƙa da lafiyar Tinubu, da kuma wani rahoton neman rancen dala biliyan 20 da ake dangantawa da wani abokin hulɗar kasuwanci na Faransa.

Atiku ya ce idan da gaske shugaban ƙasar ya tafi Makka ne domin yi wa Najeriya addu’ar samun zaman lafiya da ci gaba, ya kamata fadar shugaban ƙasa ta riƙa wallafa hotuna da bidiyoyi na Tinibu a Kasa mai tsarki yana Ibada kuma. 

Ya kuma buƙaci a nuna Tinubu a kusa da Ka’aba da kuma yayin da yake gudanar da ibadar Umrah, domin jama’a su samu tabbacin kasancewarsa a wurin.

A cewarsa, ’yan Najeriya na da haƙƙin sanin inda shugaban ƙasarsu yake da kuma samun bayanai sahihai game da ayyukansa yayin tafiyar.

A wani labari na daban, jam’iyyar ADC ta sauya ranar ƙaddamar da yaƙin neman zaɓen shugaban ƙasarta a Jihar Sokoto daga ranar Asabar, 31 ga Oktoba, zuwa Laraba, 4 ga Nuwamba, 2026.

Rahotanni sun nuna cewa jam’iyyar ta ɗauki matakin ne saboda wasu buƙatu da suka shafi shirye-shirye da tsara yadda za a gudanar da taron.

Sakataren yaɗa labaran jam’iyyar na ƙasa, Bolaji Abdullahi, ya tabbatar da cewa ba za a gudanar da taron a ranar Asabar ba, sai dai ya ce ana buƙatar tabbatar da sabuwar ranar.

Tsohon mataimakin shugaban ƙasa, Atiku Abubakar, ya zargi Shugaba Bola Ahmed Tinubu da ƙoƙarin kauce wa alhakin matsin tattalin arziki da ’yan Najeriya ke fuskanta, bayan shugaban ƙasar ya zargi ’yan adawa da haddasa yunwa da talauci a ƙasar.

A cikin wata sanarwa da daraktan yaɗa labarai na kwamitin yaƙin neman zaɓen Atiku a jam’iyyar ADC, Phrank Shaibu, ya fitar, Atiku ya kwatanta kalaman Tinubu da mutumin da ya kunna wuta sannan ya ɗora wa maƙwabtansa alhakin hayaƙin da ya tashi.

Atiku ya bayyana cewa jam’iyyar APC ta shafe shekaru takwas tana mulkin Najeriya kafin Tinubu ya zama shugaban ƙasa, yayin da gwamnatin yanzu ta ƙara kusan shekaru uku da rabi a kan mulki. Saboda haka, ya ce bai dace gwamnati ta ɗora wa ’yan adawa alhakin matsin rayuwar da jama’a ke ciki ba.

Tsohon mataimakin shugaban ƙasar ya kuma yi tambayoyi kan matakan tattalin arzikin gwamnatin Tinubu, ciki har da cire tallafin man fetur, faɗuwar darajar naira da ƙaruwar talauci. Ya kuma nuna damuwa kan matsalar tsaro da ta haɗa da kashe-kashe, garkuwa da mutane da tilasta wa al’umma barin muhallansu.

Bugu da ƙari, Atiku ya buƙaci gwamnati ta yi bayani kan wasu kuɗaɗen da ake kashewa, musamman waɗanda suka shafi tsaron makamashi da ayyukan bututun mai na kamfanin NNPC.

Ya jaddada cewa ya kamata a auna nasarar gwamnati bisa yadda rayuwar ’yan Najeriya take tafiya, maimakon dogaro da bayanan da jami’an gwamnati ke gabatarwa a tarukan siyasa.

Atiku ya bayyana babban zaɓen shugaban ƙasa na shekarar 2027 a matsayin damar da ’yan Najeriya za su tantance ayyukan gwamnatin Tinubu tare da yanke hukunci kan yadda aka tafiyar da ƙasar.