An Lalata Turakun Lantarki Goma A Kano

KANO —

Kamfanin ya yi kira ga jami’an tsaro da su ƙara ƙaimi wajen kamo mutanen da ke da hannu wajen lalata kayayyakin wutar lantarki.

Kamfanin Wutar Lantarki na Najeriya (TCN) ya bayyana cewa an lalata aƙalla manyan turakun wutar lantarki guda 10 a yankin Kano cikin watanni biyar, lamarin da ka iya kawo cikas ga samar da wutar lantarki.

Turakun da aka lalata suna kan layukan wutar lantarki na Kano zuwa Zariya, Kano zuwa Katsina da kuma Kano zuwa Hadejia.

Manajan TCN mai kula da yankin Kano, Injiniya MK Bello, ne ya bayyana hakan yayin wani gangamin wayar da kan jama’a game da illolin lalata kayayyakin wutar lantarki.

An gudanar da gangamin ne a garin Paki, da ke Ƙaramar Hukumar Ikara ta Jihar Kaduna.

Da yake jawabi ga Hakimin Paki da sauran shugabannin al’umma, Bello ya ce kare kayayyakin wutar lantarki nauyi ne da ya rataya a kan kowane ɗan ƙasa.

Ya bayyana cewa, ta hanyar haɗin gwiwar jama’a, an samu nasarar kama mutane sama da 33 da ake zargi da hannu wajen lalata kayayyakin wutar lantarki.

Bello ya ƙara da cewa kuɗaɗen da aka ware domin faɗaɗa hanyoyin sadarwar wutar lantarki na iya komawa wajen gyara ko sauya kayayyakin da aka lalata, waɗanda gyaransu ke cin miliyoyin naira.

A nasa jawabin, Mataimakin Babban Manajan TCN mai kula da harkokin rarraba wutar lantarki, Injiniya Ibrahim Aliyu, ya ce ayyukan masu satar tarkacen ƙarafa na ƙara zama babbar barazana ga kayayyakin kamfanin.

Ya bayyana cewa an lalata manyan turakun wutar lantarki sama da 20 a yankin Kunkumi kaɗai.

Aliyu ya yi kira ga jami’an tsaro da su gurfanar da mutanen da aka kama bisa zargin lalata kayayyakin wutar lantarki a gaban kotu, domin hukunta su ya zama gargaɗi ga sauran masu irin wannan ɗabi’a.

Ya kuma yi gargaɗi game da haɗarin gina gidaje a ƙarƙashin manyan layukan wutar lantarki. Ya ce ya zama dole a bar tazarar mita 15 zuwa 25 tsakanin gine-gine da waɗannan layuka domin kare rayukan jama’a.

A cewarsa, wasu mutane na haƙa ƙasa domin yanke wayoyin lantarki, yayin da wasu kuma ke lalata turakun wutar domin cire ƙarfen da ke cikinsu su sayar.

A nasa ɓangaren, Kauran Zazzau kuma Hakimin Paki, Alhaji Ja’afaru Aliyu Paki, ya gode wa tawagar TCN bisa ziyartar al’ummarsa domin wayar da kan jama’a kan muhimmancin kare kayayyakin wutar lantarki.

Ya tabbatar da cewa al’ummarsa za ta ci gaba da sanya ido tare da taimaka wa jami’an tsaro wajen hana satar kayayyakin gwamnati, ciki har da na wutar lantarki da na layin dogo.

Ya kuma bayyana cewa limamai da malaman addini a yankin na ci gaba da gudanar da addu’o’i domin samun zaman lafiya da kuma kare kayayyakin more rayuwar al’umma.

Hukumar Kula da Wutar Lantarki ta Najeriya (TCN) ta bayyana cewa an lalata manyan turakun wutar lantarki sama da 18 a jihohin Ribas, Abiya da Kano tsakanin ranakun 9 zuwa 14 ga watan Janairun 2025.

A cewar hukumar, an lalata turakun da ke kan layin wutar lantarki na Owerri zuwa Ahoada mai ƙarfin 132kV a Jihar Ribas. A Jihar Abiya kuma, an sace manyan wayoyin lantarki da wasu sassan gine-ginen turakun da ake gyarawa.

A Jihar Kano, wasu bata-gari sun lalata turakun da ke kan layin wutar lantarki na Katsina zuwa Gazoua mai ƙarfin 132/33kV.

A Abuja, an gano lalacewar wayoyin wutar lantarki da ke ƙarƙashin ƙasa a ranar 17 ga watan Janairu, lamarin da ya haddasa tsaiko wajen samar da wutar lantarki a wasu sassan birnin.

Mai magana da yawun TCN, Ndidi Mbah, ta bayyana cewa irin waɗannan ayyuka na lalata kayayyakin wutar lantarki babbar barazana ce ga ci gaban fannin samar da wuta a ƙasar.

Ta yi kira ga al’umma da su kasance masu sanya ido tare da taimakawa wajen kare kayayyakin, domin suna da muhimmanci ga rayuwarsu da ci gaban ƙasa baki ɗaya.

Mbah ta jaddada cewa hanyoyin sadarwa da kayayyakin wutar lantarki muhimman kadarori ne na ƙasa, don haka ya zama wajibi kowa ya taka rawa wajen kare su da kuma dakile ayyukan lalata su.

Kamfanin Samar da Wutar Lantarki na Najeriya (TCN) ya bayyana cewa har yanzu babu takamaiman lokacin da za a dawo da wutar lantarkin da ta katse a wasu sassan Arewacin ƙasar.

Kamfanin ya ce duk da ƙoƙarin da ake yi na gyara matsalar, rashin tsaro ya kawo cikas ga ci gaba da aikin, lamarin da ya hana ma’aikatansa shiga yankin da aka lalata turakun lantarkin.

Wata babbar jami’ar TCN, Nafisatu Asabe Ali, ta bayyana cewa kamfanin ya samu takardar gargaɗi daga Ofishin Mai Bai wa Shugaban Ƙasa Shawara kan Harkokin Tsaro, wadda ta nuna cewa akwai babban haɗari ga duk wanda ya shiga yankin da aka lalata manyan turakun lantarki uku.

Ta ce duk da cewa TCN ya tanadi kayan aikin da ake buƙata domin gudanar da gyaran, ba zai iya tura ma’aikatansa zuwa yankin ba har sai hukumomin tsaro sun tabbatar da cewa babu barazana ga rayuwarsu.

Matsalar tsaro ya zama babban cikas ga aikin gyaran da dawo da wutar lantarki a yankunan da abin ya shafa.

Kimanin kwanaki huɗu kenan wasu sassan Arewacin Najeriya ke fama da rashin wutar lantarki, bayan lalacewar babban layin wutar lantarki na Shiroro zuwa Mando, wanda ke samar da wuta ga mafi yawan yankunan Arewa.

Bayan faruwar lamarin, Kamfanin Samar da Wutar Lantarki na Najeriya (TCN) ya yi ƙoƙarin amfani da layin Ugwaji zuwa Apir mai ƙarfin 330kV domin isar da wutar lantarki zuwa yankin, amma shi ma layin ya samu matsala.

TCN ya bayyana cewa lalacewar waɗannan layukan ta jefa jihohin Arewa maso Gabas da Arewa maso Yamma, da kuma wasu sassan Arewa ta Tsakiya cikin duhu.

Injiniya Nafisa ta ce har yanzu babban layin Shiroro bai fara aiki ba, kuma babu takamaiman lokacin da za a kammala gyaransa saboda matsalar tsaro da ke hana ma’aikata isa yankin.

Ta ƙara da cewa ko da an kammala gyaran layin Ugwaji zuwa Apir, ƙarfin wutar da zai iya ɗauka a halin yanzu bai wuce 350MW ba.

Sa a iya raba wutar da za a samu ne kawai ga wasu yankuna na jihohin Kano da Kaduna, da kuma Jamhuriyar Nijar.