El-Rufai Ya Nemi Taimakon Duniya Bayan Kwanaki 256

KANO —

Tsohon Gwamnan Jihar Kaduna, Nasir El-Rufai, ya yi kira ga Shugaban Amurka, Donald Trump, da takwaransa na Faransa, Emmanuel Macron, tare da sauran shugabannin ƙasashen duniya da ƙungiyoyin kare haƙƙin ɗan Adam, da su mai da hankali kan ci gaba da tsare shi da ake yi.

“Samun shari’a da adalci ba aikin jin ƙai ba ne, kuma ba wata alfarma ba ce. Haƙƙi ne na asali da kowane ɗan Adam yake da shi.”

A cikin wani saƙo da ya wallafa a shafinsa na X a ranar Juma’a, wanda ya kasance rana ta 256 da yake tsare, El-Rufai ya jaddada cewa yana da haƙƙin samun shari’a ta gaskiya da adalci.

Tsohon gwamnan ya bayyana cewa samun adalci da shari’a cikin gaskiya ba wani abu ba ne da ya kamata a ɗauke shi a matsayin kyauta ko alfarma, domin haƙƙi ne na kowane ɗan Adam.

A cikin saƙon da ya sanya wa alamar #FairTrial, wato shari’a ta adalci, El-Rufai ya yi wa Trump da Macron alama kai tsaye, tare da wasu ƙungiyoyi da hukumomin ƙasa da ƙasa.

Daga cikin waɗanda ya ambata akwai Majalisar Ɗinkin Duniya (UN), Majalisar Kare Haƙƙin Ɗan Adam ta Majalisar Ɗinkin Duniya, Amnesty International, Tarayyar Turai (EU) da Ƙungiyar Tarayyar Afirka (AU).

Haka kuma, ya ambaci Fadar Shugaban Amurka (White House), Gwamnatin Birtaniya da Majalisar Dokokin ƙasar, tare da manyan kafafen yaɗa labarai na duniya da suka haɗa da CNN, BBC, Al Jazeera, The New York Times da The Economist.

Masu bibiyar al’amuran siyasa da shari’a sun bayyana wannan mataki a matsayin ƙoƙarin jawo hankalin ƙasashen duniya kan halin da tsohon gwamnan ke ciki da kuma batun shari’arsa.

Wannan kira na El-Rufai ya zo ne kwanaki kaɗan bayan wata Babbar Kotun Tarayya da ke Abuja ta ƙi amincewa da buƙatarsa ta soke ɗaya daga cikin ƙorafe-ƙorafen da ake yi masa bisa hujjar cewa shaidun da aka gabatar ba su isa ba.

Ƙarar da Hukumar Tsaro ta Farin Kaya (DSS) ta shigar a kansa tana da alaƙa da zargin saurarar tattaunawar wayar tarho ba bisa ƙa’ida ba, wadda ta shafi Mai Ba Shugaban Ƙasa Shawara kan Harkokin Tsaro, Nuhu Ribadu.

A yayin yanke hukunci a ranar Litinin, 26 ga Oktoba, Mai Shari’a Joyce Abdulmalik ta bayyana cewa masu shigar da ƙarar sun gabatar da isassun shaidu da suka sa ya zama dole El-Rufai ya gabatar da kariyarsa idan yana da hujjojin da zai kare kansa da su.

Shari’ar ta samo asali ne daga wata hira da El-Rufai ya yi da gidan talabijin na Arise News a watan Fabrairu, inda ya yi magana kan zargin saurarar tattaunawar wayar tarho ta Nuhu Ribadu.

Tsohon Gwamnan Jihar Kaduna, Nasir El-Rufai, ya shafe sama da kwanaki 10 a hannun hukumomin Najeriya tun bayan da ya je amsa gayyatar Hukumar Yaƙi da Cin Hanci da Rashawa da Yi Wa Tattalin Arziƙi Zagon Ƙasa (EFCC).

A ranar 16 ga watan Fabrairu ne El-Rufai ya je ofishin EFCC da kansa domin amsa gayyatar da hukumar ta yi masa.

Da farko, EFCC ta tsare shi har zuwa daren Laraba, 18 ga watan Fabrairu, kafin daga bisani ta miƙa shi hannun Hukumar Yaƙi da Cin Hanci da Rashawa da Almundahanar Dukiyar Al’umma (ICPC). Tun daga lokacin ne ba a ƙara jin wani cikakken bayani game da inda yake ba.

A ranar Larabar da Hukumar Tsaro ta Farin Kaya (DSS) ta gurfanar da tsohon gwamnan a gaban kotu, El-Rufai bai halarci zaman ba, saboda ICPC ba ta kai shi kotun ba.

A wannan rana, Babbar Kotun Tarayya da ke Abuja ta ɗage sauraron ƙarar da DSS ta shigar a kansa kan zargin saurarar tattaunawar wayar tarho ta Mai Ba Shugaban Ƙasa Shawara kan Harkokin Tsaro, Nuhu Ribadu, ba bisa ƙa’ida ba.

Kotun ta kuma ƙi duba buƙatar belin da lauyansa, Oluwole Iyamu, ya gabatar.

Lauyan DSS, Oluwole Aladedoye, ya bayyana cewa bai kamata kotun ta shiga batun belin ba, kasancewar ba a fara sauraron ƙarar gaba ɗaya ba. Mai Shari’a Joyce Abdulmalik ta amince da wannan hujja.

A ranar Litinin, 23 ga watan Fabrairu, mai magana da yawun tsohon gwamnan, Muyiwa Adekeye, ya wallafa wani saƙo a shafinsa na X, inda ya bayyana cewa ICPC ba ta sanar da lauyoyin El-Rufai komai ba game da buƙatar belinsa.

Ya kuma ce hukumar ba ta nuna wa lauyoyin wata takarda da ke neman a ci gaba da tsare tsohon gwamnan fiye da wa’adin sa’o’i 48 da doka ta tanada ba.

Lamarin ya jawo hankalin wasu fitattun ’yan siyasa da sauran jama’a. Daga cikinsu akwai tsohon Mataimakin Shugaban Ƙasa, Atiku Abubakar, wanda ya nemi gwamnati ta yi bayani kan halin da El-Rufai yake ciki.

Yayin da wasu ke kira ga gwamnati da ta fito ta bayyana halin da ake ciki, wasu kuma sun buƙaci a tabbatar da bin doka da oda wajen tafiyar da shari’ar tsohon gwamnan.

Kundin Tsarin Mulkin Najeriya ya tanadi ’yancin kowane mutum na samun walwala da kuma kariya daga tauye ’yancinsa ba bisa ƙa’ida ba, kamar yadda masanin shari’a a Najeriya, Yusuf Adamu Kaile, ya shaida wa BBC.

Lauyan mai zaman kansa ya bayyana cewa idan hukumomi suka take haƙƙin ɗan Adam wajen tsare wanda ake zargi, akwai matakan shari’a da za a iya ɗauka domin ƙalubalantar hakan.

Ya ƙara da cewa a wasu yanayi, kotu na iya mayar da hankali kan batun tauye haƙƙin wanda ake zargi, maimakon ci gaba da duba zargin laifin da ake yi masa kawai.